سعيدله بيرليکده آذربايجانين دوستاقدا اولانلارينا ايتحاف اولونور-آتابی

منبع: اویرنجی

سعيدله بيرليک­ده آذربايجانين دوستاق­دا اولان­لارينا ايتحاف اولونور-آتابی

چوخدان­دير قولاغيميز سسده دير آذربايجانلي دوستاق­دا اولانلارينين آزادليق خبرلرين آلا.

گؤزلريميز يولدا بيزيم سئويملي يولداشلاريميزين سسلريني آزاد هاوادا ايزله­يه.

عابباس ليسانلي، سعيد متين­پور، بهروز صفري، ليلا حيدري، جليل غني­لو، عليرضا متين­پور، هادي حميدي، شيرزاد حاجيلو، منصور جدي ها بئله، نئچه-نئچه آدلاري ياديم­دا اولمايان يولداشلاريميز اؤز آزادليق­لاري ايلا بيزي سئوينديره­جک­لر.

بو گون گونئيين کوچه­لري گوللرله بزه­نيب دوستاق­دا اولان يولداشلارين آياق يوللارينا.

عابباس به­يي اردبيل­دن دالي کسيلمه­دن اهره يوللانديريرلار. 18 آي سوره­لي دوستاق­دا ساخلاناندان سونرا بير ايل­ده اهر دوستاغينا يوللانديريرلار.

بهروز صفري حايات يولداشي­ايله بيرليک­ده زنجان­دان تهرانا يوللانيليرلار،

بيرليک­ دئديک­ده، ايکي­سي آيري آيري اينفيرادي سلولدا ساخلانيليرلار. تکجه بونلاري عذاب وئرمک اوچون بير يئره گتيريب بيربيرلرينين حوضوروندا ايشکنجه ائله­ييرلر.

عليرضاني سعيدله بير يئرده ساخلاماق ايسته­ميرلر.

جليل داي ايشکنجه­يه عادت ائله­ييب. 7 آيدان آرتيق­دير سعيدله بيرليک­ده قرار وثيقه­لري وئريلمه­يينه باخماياراق ايچريده يئرسيز ساخلانيليرلار.

سعيد متين­پورون 7 آي سوره­لي اينفيرادي سيللول­لاردا ساخلانماغينا باخمايراق، بو سوره­جده کيمسه­ايله گؤروشمور. يالنيز ساخلانيلير. تيلفونلارينين دا قارشي­سي آلينير. اونلار سعيدي سينديرماق ايسته­ييرلر.

سعيدين حايات يولداشی عطيه خانيم بو زامان دا سعيدله بيرليک­ده ديره­نير، ايچريدن داغيلسادا اؤزده قويمور هئچ کيمسه بونو حيس ائده. نه دوستا بيلينديرير نه دوشمانا، نه وارسا اؤزو­ ايله ايچينده ياشادير. بلکه ده چوحلاريندان گيلئي­لی اولا آنجاق هئچ زامان اؤزونه گتيرمه­يير. سعيدله دوستاغينی پايلاشير.

ائله بونلارلا برابر نئچه باشقا يولداشلاريميز دا دوستاق­دا ايديلار. (عبدالله عباسي جوان، صالح کامراني، ایلقار مرندلي، ميرقاسم سيدين­زاده، دکتر حيدري..... )

عبدالله به­ي دوستاق­دا اولان زامان ايشکنجه خبري ­ايله سکته خبري ياييلميشدير. عبدالله­ ني گؤردوک­ده آدام ايستر ايسته­مز بوخبر يادينا دوشور. عبدالله­دان سوروشماميش اونو آريخلاماغي، اوزون­ده بير سيخينتينين اولماغيني گؤرمک اولور. بلکه بو سيخينتی هله­ده يوداشلاری ايچريده اولماغا قاييدير.

سعيددن دانيشديق­دا، عبدالله دردي دئشيلير. 16 ايلليک يولداشي هله­ ده دوستاق­دادير. عبدالله نئچه شعر اوخويور. بو شعرلري اؤنجه­دن بير ائشيتمه­ميشم. عبدالله بو شعرلري زيندان­دا دئييب.

بئله آلينير زيندان­دا دئييلن شعرلر سعيد متين­پور اوچون دئييلميش اولا .

بيرليک­ده بو شعرلري اوخوياق­:

تصادف بو،

هر مين شعردن

بيري آغليم­دا قالير.

هر مين آغليم­دا قالاندان،

بيرين يازيرام

ياني من شاعيرم.

عبدالله- ائوين

***********

سحر تئزدن

ساعات آخشامين بئشي،

قاپيدان گيرن دونقوز،

سانکي بير ملک

مين فسادلا دئييلن يالان

ان گؤزل خبر

و سن،

نه­يه شوکر ائده­جک­سن

يئشيل آلمايا

ماوي دنيزه

سياه اورمانا

يا هامي سي ني....

يوخا چئويرن

بير قارديانا

عبدالله- ائوين

***********

لعنت اولسون

آغليما گلن سن

سيگاريمين توستوسونده،

گؤرونن رسيم سن

هاردان گيردين ياشاييشيما

لعنت اولسون هر شئييم سنسن.

***********

سوسوزودوم

دوداقلاريم پاتلاميش­دير سوسوزلوق­دان

ياشاييش چاتلاق بير چامورلوق­دور

گؤزلرينين قارانليغيندا آختارديغيم سرين بولاقلاري

و زهرمار اولور

بير ايچيم سو

گؤزلرينين قارانليغيندا

عبدالله- ائوين

***********

اوتاق­دا هر شئي ايکي دير

قاپي ايکي

پنجره ايکي

هاوالانديرما ايکي

ايشيق ايکي دير

ايشيق­لارين بيري سونوک

و من يالنيزايديم

تصادف دئييل بو

ايکي اوتاغين بيرلشمه­سيندن

يارانميش­دير بو اوتاق.

عبدالله- ائوين

***********

بيري سي بير گؤن قالميش

دوقسان يئره آدي­ني يازميش

بيري سي دوقسان گون قالميش

هئچ بير يئره آدين يازماميش

ساده جه دووارلاردا جيزيق­لاري قالميش

عبدالله- ائوين

***********

سنين شرفيوه ايچدي­ييم هر ايچگي

زهرمار

سنسيز ايچدي­ييم هر ايچگي

زهرمار

من اؤزگور سن دوستاق

سنين ياشاديغين، ايچگي

منيم ايچدي­ييم،

زهرمار

سنله بيرلش­سم

سنله گؤروش­سم

اولماز هر نفسيم،

زهرمار

***********

تورپاق بيزيم

ملت بيزيم،

شرف بيزيم، شان بيزيم

دوستاق بيزيم

قان بيزيم

اوفوق­لاردا گؤرونن گله­جک بيزيم

اوره­ک­لرده گولله باتان يئر بيزيم

دوستاق بيزيم

قان بيزيم

عبدالله- ائوين

***********

گؤردون،

بيزيم تورپاق­لاردا

هر گؤرونتو

ساپ­ساري

تام سندن منيم کيمي

عبدالله- ائوين

***********

يالان دانيشديم

سن آغلادين.

سنين آغلاماغين،

بير ميللتي ديريلدير

آغلا، من آغلاياجايام

آنجاق ايشيق­لار ساچاق هر يانا، پارلاياجاق آذربايجان،

بيته­جک بو قارانليق­لار، آيدينليغا چيخاجاق اينسان­­ليق.