مصاحبه با وکیل هفته نامه توقیف شده شمس تبریز

توضیح وبلاگ: لازم به توضیح است در این مصاحبه بعضی اشتباهات صورت گرفته که مورد تأیید آقای صالح کامرانی نمی باشد.
1) صالح کامرانی عضو هیچ حزب قانونی و غیر قانونی از جمله حزب اراده ملت نمی باشد
در خصوص جمله سونرا بیرلیک اوچون «حکیمی پور» جنابلارینان «اراده ملت ایران» پارتییاسیندا چالیشماغا باشلادیم لازم به ذکر است که این جمله در ترجمه تحریف شده است.
2) صالح کامرانی در هیچ یک از مصاحبه ها و نوشته های خود اعلام نکرده که عضو حزب خاصی است

موصاحیبه: AzBilTop آیلین.د.
- آقای کامرانی اؤنجه اؤزونوزو کامیل تانیتدیریب، سونرا شهر شوراسینا آدای اولماقدان هدفلرینیزی بویورون.
آدیم صالیح، سوی آدیم کامرانی دیر. 1351- نجی ایلده اهر شهرستانیندا آنادان اولموشام. اورتا مکتبه دک اهرده درس اوخوموشام. بیلدیگینیز کیمی اهر بیر محروم شهردیر و فرهنگی امکانات اوردا چوخ آزدیر. آذربایجانین ان بؤیوک مسئله سی، اونون ایقتیصادی دورومودور. اهرده بو دورومدان استثنا دئییل دیر. درس اوخویان چاغلاری، چالیشدیقلاریم آرتیق موطالعه ده کئچدی. 1371 ده شیراز بیلیم یوردوندا، حقوق ساحه سینده قبول اولدوم. شیراز بیلیم یوردوندا «صندوق رفاه دانشجویی آذربایجان»ی قوروب، درگی بوراخماغا چوخ چالیشدیق. صاندیغین ایشلریندن بیریسی، یورددا تورکجه کیلاس قورماق ایدی. یوکسک لیسانس دؤرسینی ده شیراز بیلیم یوردوندا باشلادیم. هامان زامان «وکالت کارآموزی سی» ندن، تهراندا، شهید بهشتی بیلیم یوردوندا قبول اولدوم. او دؤره ده، تورکمنلر، قاشقایلار و افشار تورکلر یاردیمییلا، «انجمن دانشجویان ترک دانشگاه شیراز»ی قورماغا چالیشدیق. او زامان آذربایجان درگیلرینی موطالعه ائدرکن «خاک پاک»، «ایران آزاد» و «کویر» درگی لرینده چالیشیردیم. سونرا بیرلیک اوچون «حکیمی پور» جنابلارینان «اراده ملت ایران» پارتییاسیندا چالیشماغا باشلادیم. جباری جینابلاری و آیری تورک یولداشلاریمیزلا شورا اویه سی سئچیلدیم. شیرازدا تحصیل ائدنده «شمس تبریز»ی 22 اتهاملا تؤهمتلندیرمیشدیلر. او زامان تعطیلاتا گئتمیشدیم. اونون ساوین، یولداشلارین بیریسیندن آلدیم. تهران و تبریز وکیللرینین بیر نئچه سیندن پرونده نین وکالتین ایسته میشدیلر. آنجاق اونلار بویون قاچیرتمیشدیلار. اؤز وکیلیده ایشلردن راضی دئییل ایدی. منیم ده وکالت پرونده مین آلماسیندان 12 گون کئچیردی. پرونده نین وکالتین بوینوما آلدیم. 22 اتهام، ایکی اتهاما ائندی. «شمس تبریز» باغلاندی(ایکی ایل تعلیقی زیندان و 74 ضربه شاللاق). اوندا گؤردوم آذربایجانلیلار، اکثریت اولاراق، نه قدر غریبدیرلر. مقاله لریمیز عمومی روزنامه لرده چاپ اولونموردو، روزنامه لر بیزیمله موصاحیبه آپارمیردیلار. موخبیرلیکلر موصاحیبه لریمیزی تلکس اوستونه یوللامیردیلار. اونا گؤره الوسلارآراسی رسانه لردن یارارلاندیق. سؤزلریمیز بعضی خاریجی روزنامه لرده منعکس اولدو. «فرانس پرس» موخبیرلیکلری بو گوزاریشی موختلیف یئرلره گؤندردی. دوکتور «سازگارانین» مسئله سی ایکینجی وکالت تجربه م ایدی. ایندی ده «حکیمی پور» جینابلارینین و «آذربایجانلی بیلیم یوردلولارینین 6 اویه سینین وکیلی ام. بورجومو ادا ائتمک اوچون یوکسک لیسانس تئزیمی، منه کیملیگیمی اؤیرتدیگی اوچون پروفسور زهتابی نین روحونا سوندوم. شورا بیر قرندن آرتیق مرکزی و یئرلی حاکمیت آراسیندا دارتیشما یارادیب. شورا اؤلکه میزده، آذربایجان بولگه سینده چوخلو هزینه لر وئریبدیر. خالقین دوگونلری شورا یولویلا آچیلمالیدیر. شورا بیز آذربایجانلیلارا، ایالتی – ولایتی انجمن قالیبینده(نمونه سی تبریزین غیبی انجمنی) چوخلو یارارلی اولوبدور. تهران شورا سئچگی لرینه قاتیلدیغیمین دلیللریندن بیریسی تهران دا اولان ایشیم ایدی. بیریسی ده تهرانین یوزده یئتمیشی نین تورک اولماسی ایدی. بو جمعیتین چوخو موهاجیردیر. موهاجیر لرین اؤزل فرهنگی – اجتماعی موشکوللری واردیر. تهران ایرانین باش کندی اولاراق بیر آینا کیمی بو فرهنگلری گؤسترمه لیدیر.
- آذربایجان میللتینین ان اؤنملی ایستگی ایندیکی دورومدا نه دیر؟
1304 ده، ریضا شاه اینگلیسلیلرین الی ایله ایرانا حاکیم اولاندا، اونلار ایراندا بوتون حرکت و اینقیلابلارین آرخاسیندا آذربایجانلیلارین رولون آرتیق گؤردولر. اینقیلابی یئنی فیکیرلر اورادان باشلاتیردی. جوغرافیایی موقعیتی ده ان أؤنملی مسأله ایدی. بو موقعیته گؤره کئچمیشلردن آوروپایی اؤلکه لری ایله ایلگی سی واریمیش و فیکیرلر اورادان ایرانا گلیرمیش. بو میللت قهرمان و ظولمون قارشیسیندا دوران بیر میللت دیر. رضاخان، آسیمیلاسیون سیاستینی بو میللته ایشلتدی و اؤز فیکریجه اؤلکه نین ساخلاماغی، امنیت یاراتماغی و خالقین منفعتلرینی تأمین ائتمه گی، او بیری میللتلرین، اؤزوده آذربایجانلیلارین هر طرفلی خلع اولونماسی ساندی. فرهنگی و کیملیک باخیمیندان بو سیاست باشلانیب و آذربایجان میللتینین تاریخی تاپدالانیب، تحریف اولوندو. یئرلرین آدلارینادا رحم قیلمادیلار. من مینلرجه بلکه ده اون مینلرجه دولت هیأتین مصوبه لرینده، میللتیمیزین حاققیندا آسیمیلاسیون سیاستی نین ایجرا اولونماسی نی گؤستره بیله رم. میثال اوچون شهرلرین، داغلارین، داشلارین و دره لرین ده آدینی دئییشدیلر. آذربایجان میللتینین ان بؤیوک و اؤنملی ایستگی، کیملیگینه ال تاپماغیدیر و بو کیچیک ایستک دئییل. بو ایستگه یئتیشن میللت، اوغور قازانمالیدیر. ایکینجی ایستگی ایقتیصاد دیر. آنا یاسانین 48- نجی اصلی – ایقتیصادی ایمکانات اوستانلار آراسیندا بؤله نده تبعیض اولماسین – تأسفلرله ایجرا اولونمور و تبعیض واردیر. بورادا شورانین اؤنمی گؤرونور. ایصلاحات دؤولتی ایجرا اولونمایان چوخلو شعارلارلا قاباغا گلدی. شمس یازیچیسی، لوائی جینابلاری دئییر:«زخم درون را چاره نکرده، برون را پاره می کنند.»
- یئنی شورادا آذربایجان نوماینده لرینین نقشی نیظامین دموکراتیزه اولماغیندا و بو میللتین حقوقون بیان ائدیب آلماغیندا نه اولا بیلر؟
شورا کیمین توپلومسال ایشلرده جمعی حوقوقو دیریلتمک هدفی وار. ن.ماینده لر میللتیمیزین ایستکلریله یاخیندان تانیش اولمالیدیرلار. دئییرلر تحقیر اولان تحقیر اولونموشون دردینی بیلر. شیعه عنوانیندا بو مملکتده تحقیر اولمامیشیق مذهبی تحقیرین نه اولدوغونو بیلک. بو اساسدا بیر آذربایجانلی فرهنگی تحقیرینین نه اولدوغونو یاخشی بیلر. تحقیر اولونموش اینسانلار کی آذربایجان میللتینین قانینا تحقیری سالیبلار، بونلاری مشورته چاغیراق. بو ایش همگرایی روحونو کوجلندیریب تهران شوراسیندا غیرمرکزی پروژه لری قاباغا آپاریب دموکراتیزاسیون اوچون نیظامدا چوخلو مثبت تأثیرلری اولاجاق.
قایناق: یول(هفته نامه خبری دانشجویان ترک دانشگاه تهران)، شماره 16، دوشنبه 5 اسفند 1381