ندن "صالح کامرانی" توتوقلو قالمیش؟
صالح کامرانی-نین توتولماسی و بو گونه دک حبسده یاتماسی چوخلارینی تعجبلندیرمیشدیر.کامرانی سون ایللرده بیلرجه سینه بیر اکتیویست کیمی یوخ بیر وکیل کیمی تورکچولوک حرکاتینین بویوک بوشلوغلارینین بیریسینی دولدورماغا چالیشیردی.بونون اوچون ده توتولدوغو زامان سورولوردو "صالح نئینه ییب؟"دوغرودان دا صالح وکالتدن باشقا بیر ایش ائتمه ییردی.او نئچه تورکچونون وکالتینی گوتورموش و محکمه لرده اونلارین ایشلرینین دالیسیجایدی.او موکللریندن محکمه ده مودافیعه ائدن زامان و سونرا ائشیکده اونلارین خبرینی یایان زاماندا دا سیاسی اوپوزوسیون ادبیاتی ایشله تمه ییب یالنیر آنا یاسایا دایانیردی.بئله بیر آدام نیه گره ک توتولسون؟باشقا یولداشلاریمیز کیمی ظاهیرده ده اولموش اولسا اوندان بهانه تاپماق اولماز.او اعتیراضلار زامانی دا آذربایجاندا یوخ تئهراندایدی.
صالح کامرانی تورک سورونونو حقوقی بیر فورما یونلتمه کده یدی.او تورک حرکاتیندا اولان حقوقی چالیشمانین بویوک پتانسیلینی هر شیی-دن یاخچی آنلامیشدی.چونکو بیر طرفدن چالیشانلار یاسا دیشی حرکت ائتمه ییر لر او بیر طرفدن یاسا ایرقچی دگیل و فارسدان باشقا میللتلرین و سویلارین دا مدنی و باشقا حاقلارینی نظرده توتموش.
دولت ده بونو بیزیم کیمی دوشونوب و حرکت عمومی لشن زامان و میللتین اویانیشینی گورن کیمی تئز حقوق قاپیلارینی باغلادی.بیر طرفدن هر نه یی ایران قرئته سینده قیسسالتدی. او بیر طرفدن تورک شهرلرینده توتولانلارین هئچ بیریسینه مودافیعه ایمکانی وئرمه دی.(رضا عباسی تیر آینین آلتیسیندا زنگاندا توتولوب و توتولان گونده ن قرنطینه ده ساخلانیلیر.اونون آدینا اینقلاب دادسراسیندا هئچ دوسیه ده ثبت اولماییب.وکیلی گلنده اونون قاضی تانیتدیریلمیش آدام دا ایداره یه گئتمه میشدی.)
تورکلر حقوقی بیر دعوادا و برابر بیر دورومدا باجاراجاقلار.ایچریده ده ائشیکده ده.ایچریده خالقینین اویانیشی و یاسانین ایمکانلاری و ائشیکده حرکتین رفورمیست و سوسیال دوروم بیزی قازاندیراجاق.نه قده در ده بیزی محکمه لرده و ایطلاعات ایداره لرینده اینجیتسه لر بو یولدان واز گئچمه گیمیز عاقیل ایشی اولمایاجاق.دوشمن قورخان یئره ساری گئتمه لی ییک.آذربایجان دادستانلاری اعتراضلاردان سونرا چوخ بویوک سوزلر دانیشدیلار و حرکتی خارجه باغلادیلار اما بو گونه دک بیر علنی محاکمه یه و اونو تئلوزیوندان یایماغا جسارتلری اولماییب.
صالح کامرانی باغلی حقوق قاپیلارینین سیمبولونا بنزه یه بیلر و ائله "هله لیک" اولموش اولسون دئیه بو قاپینی باغلی ساخلایاق دئییبلر.اما بو قاپی باغلی قالماز و اساسدا دا قالابیلمز.اویانمیش بیر خالقین اونونده دولتینده یاسادان باشقا بیر سیغیناجاغی یوخ.گئج-تئز یاسادا نظرده آلینان اصلین اجراسی مجبوریتینده قالاجاقلار.زینداندا قالانلارین ائشیکده گوزله یه نی چوخدو.اونلاری نهایت محکمه یه تاپیشیراجاقلار.خیاواندا باشلانن حرکت محکمه لر-زیندانلار و ایطلاعات ایداره لری اونونده دوزه نله نیب و معین سوزلر ایله مدنی فورمادا دوام ائده بیلر.اوندا قضاوتی دونیایا تاپیشیرابیلریک:اوتایدا گوج بو تایدا سوز!

از وبلاگ زنگانلي

تاريخ ارسال خبر 11/05/1385